Información sobre actos organizados en Gijón y en Oviedo

MANIFIESTO DÍA INTERNACIONAL DE LAS MUJERES - 8 DE MARZO DE 2005
(Si quieres leer la versión en castellano, pincha aquí)

Un añu más, ante la conmemoración del Día Internacional de la Muyer, les asociaciones ya organizaciones de muyeres convocantes facemos un balance xeneral de la nuesa situación en tolos ámbitos: sociales, culturales, políticos y llaborales.

Pidimos el desendolcu de toles medíes previstes na Llei integral contra la violencia xéneru, cola finalidá de que fine urxentemente esti terrorismu que tendría d´avergoñar a una sociedá na que miles de muyeres son maltrataes ya asesinaes tolos díes con premeditación, alevosía ya ensañamientu.

No que cinca a la custodia compartida, pidimos que s´ aplique únicamente n´aquellos casos en qu´exista una decisión llibremente adoutada polos dos proxenitores y siempres que nun hubiera situaciones de violencia, protexendo en tou momentu los drechos de les y los menores.

Pidimos el fomentu de midíes que faciliten que muyeres d´otres cultures que vivan nel nuesu país puean algamar los drechos y beneficios d´una convivencia n´ igualdá.

En cuantes a la política educativa, anque la escolarización ye obligatoria pa neñes y neños, nel curriculum académicu sigue siendo evidente l´ ausencia del papel de les muyeres na hestoria, les ciencies sociales o´l desarrollu científicu, a pesar de les nueses aportaciones al progresu de la humanidá. Ye necesario avanzar nuna política que potencie la educación nos valores de respetu a los drechos humanos, a la diversidá ya a la igualdá. Queremos una escuela pública y de calidá, plenamente laica, integradora, mixta, coeducadora, preservada del sometimientu de doctrines relixoses de cualisquier signu, y sobre tou cuando les xerarquíes eclesiástiques promueven, dende toa mena de tribunes, los sos postulaos sexistes, posiciones retrógrades, misóxines y patriarcales defendiendo, como única vía pal desarrollu la sociedá, a la familia tradicional en contra a otres fórmules posibles, xustificando con ello situaciones de violencia contra les muyeres.

Como l ´añu pasáu, siguimos insistiendo en que, en plenu sieglu XXI, entovía nun podemos decidir sobre´l nuestru cuerpu. Y preba d´ello ye que nun tenemos derechu al abuertu llibre y gratuitu.

Ye necesario afitar les llínees d´ investigación en xéneru y salú, ya que la investigación en salú, la formación de les/os sos profesionales, el tratamientu la enfermedá y la atención tán nidiamente mediatizaos por patrones masculinos. El sistema sanitariu tien d´ asumir ya incorporar propuestes empobinaes a la prevención, la meyora la calidá de vida, la desmedicalización de dalgunos procesos y la participación activa nel caltenimientu y recuperación de la salú.

No que cinca a les muyeres con discapacidá que, nun lo escaezamos, caltienen una doble llucha pola igualdá, siguimos demandando sofitu, promoción y difusión de toa mena d´ actuaciones sociales que conlleven finar con tolos pilancos, tanto sociales como arquiteutónicos.

Les muyeres siguimos discriminaes nel tema llaboral, y la excesiva precariedá nel emplegu tien tamién una seria repercusión negativa nel accesu a la proteición social. Poro, desiximos igualdá nel tratu nel emplegu ente muyeres ya homes: igualdá de tratu nes retribuciones, nel accesu y permanencia nel emplegu, na promoción ya ascensos, na formación y reciclaxe.

Denunciamos l´acosu llaboral sufríu mayoritariamente por muyeres con total impuniá pa los acosadores.

Ye urxente xenerar emplegu ya implementar iniciatives llexislatives p´ avanzar na conciliación de la vida personal, familiar y llaboral.

Consideramos necesario que la futura Llei de Dependencia contemple estes situaciones, ya que, sigún el Llibru Blancu de la Dependencia recientemente publicáu, nel 94% de los casos les muyeres son les cuidadores exclusives de les fíes ya fos, del hogar y de les persones dependientes.

Amás, pidimos la incorporación a la nuesa llexislación de les direutives comunitaries referíes a estes materies.

Toes estes son medíes imprescindibles pa que millones de muyeres puean acceder o conservar un puestu trabayu.

Desiximos por parte de los partíos políticos una modificación de la llexislación vixente pa estimular y facilitar la participación de les muyeres nos ámbitos de toma decisiones, en correspondencia col nuesu pesu demográficu, p´algamar una democracia paritaria na ellaboración de llistes eleutorales y na elleición de cargos de responsabilidá pública.