Inicio Historia Jueves de Comadres Actividades Publicaciones De interés Enlaces Contacta

MANIFIESTU " DERECHU A ALBORTAR: DECIDIMOS NOSOTRES" (Manifestación 21 de Febreru de 2008) (Cartel y manifiesto en castellano)

Les actuaciones xudiciales de va poco qu'acabaron con delles muyeres nos xulgaos por interrumpir voluntariamente'l so embarazu, fain que rescample la situación d'inseguridá xurídica na que nos dexó a les muyeres la llei del albuertu que s'aprobó nos años 80: un cierre en falso pa un problema qu'afecta a decenes de miles de ciudadanes tolos años.

Pa esta llei l'albuertu ye un delitu, despenalizáu namás si se da dalgún de los tres supuestos sabíos: forciamientu, malformación fetal o peligru pa la salú física o psíquica de la madre.

Énte esta situación, primero de too queremos manifestar el nuestru apoyu total y la nuestra solidaridá coles muyeres investigaes por albortar y con les y los profesionales que fixeron por ello hasta güei.

Tamién queremos denunciar la campaña violenta entamada polos sectores relixosos más fundamentalistes y les dereches polítiques ultraconservadores, que nun tienen reparu en promover actuaciones xudiciales y n'usar la medrana, les amenaces, la mentira, l'insultu y incluso la violencia,lo mesmo física que verbal, con tal d'imponer el so modelu de familia patriarcal, que va contra la llibertá de les muyeres y básase nel control de la nuestra sexualidá.

Güei, les organizaciones del movimientu feminista, partíos, sindicatos y entidaes que convocamos esti actu, les muyeres y los homes que participamos nesta manifestación, esiximos a los poderes públicos, instituciones y partíos políticos y, sobre manera, al gobiernu que salga de les urnes el 9 de marzu, un compromisu claru y decidíu pa que l'albuertu sía reconocíu como un derechu que les muyeres puedan exercer dende la so decisión llibre y que tea garantizáu na rede sanitaria pública.

Un derechu que se contextualice nun marcu normativu curiosu que nos garantice'l nuestru derechu a la salú na so acepción más amplia y, d'esta manera, nos confirme los nuestros derechos sexuales y reproductivos y s'acompañe de midíes qu'aseguren la educación sexual en tolos centros escolares y l'accesu a los métodos anticonceptivos y a la anticoncepción d'emerxencia con cargu a la Seguridá Social.